ala biagko sita ti ulimek

makitkitak aniniwan ko
kadagiti rimat ti matam
arig ko tay pul-oy angin
agraem nga sumrek kaunggam
awan makabalin a makalapped
agkidem ka sumepsep kudil

mariknak agbitbitek kumkupasak
ti ebkas ti ayat uray tulengak
kadagiti anek-ek mo a napartuat
kadagiti nadungngo a tadekramay
ngem nariknak dagiti saniit kukom
ta siket ko nagayuyang a nailumlom

sikat pudot dakulap ko

MANONTON DALAN

ming-mingmingak dagiti matam
maragsakanak ta dimo ipaidam
nabang-aran riknak gaput isem
mo nga apo unay a sam-it aya
nga uray no awan ti naibel-am
matarusak tay nagyan kaunggam

oh! diyak natenggel dagiti imak
nga arakupek dagiti pingping mo
a nairaman tay nalammuyot a buok
nariknak bara nga agkarayam bagik
mabalin koma nga iguyod kot sipnget
tano malingdan ta nga agkarinrakep

maibturak aya

gamgametak ti kallugong ko nga,
nga buybuyaen ka nga agpakpakada
umuges ti saniit itoy barukong ko
ngem agtepteppelak, wen nga agpayso
anya aya maaramid ko ngay, apan kan
matarusak, maamiris kon no awan kan

lumneken ni apo init mingmingak pay
tay dissu a nagtatakderam a naruay
kasatnon ngata kadagitoy sumangbay
a lawas nga agmaymaysaak ditoy biyag
maibturak ngata toy tuok adi matikag
kinagat ko't dilak saak napan nagaplag

009H adda pay kilabban

manonton dalan

kinitak tay nangitulod ti makan mi
napanonot ko, daytat trabahok idi
ad-adut pasarabor ken suweldo mi
mayat idi ni kasinsin ti adda sango
ammo no sinno dagiti mangited ado
tay nangisit awan a pulos sigurado

no dagiti moreno nga kudil tarakenko
sobraak ikabil ko tuwalya, bangbanglo
mangitugutak pay pinakbet ken adobo
no agawid dan mangbalkotak pinya
tsokolate sangpet ni ‘nang; macademia
isu, sagpaminasan birbriruken dak kano

nadungdungngo nga subot balasang
uray la aglua no makakagat nagasang
ilimlimed ko dagiti karekkek ko piman
wen, madandanaganak nga isut mabainan
maka-alis, agpinpinnerreng kami lattan
ngem mariknak ut-ut ken kibur kaunggan

appo-apputek ngiwat ko no dakkel maisubo
awan maaramkidak adingko agbisin tay nomo
agkusikusilap no agsaowak nga napunpunno
lumabbaga ngatat rupak, adda pay bain ko
no idiay away daytoy imak lat aramatek
pati toy napudpudot nga digo ket igupek

no in-inutek mangan toy riknak agmadi
saanak mabsog ken mananam, kaskasdi
binussog ko toy malidliday nga matmatak
tay isem na ken pintas na nga nakapablaak
abrutek laengen pangmalem no agawidak
adda pay tay kilabban ken puraw nga arak

009G makaisem a makarakep

manonton dalan

nagbennabennatak a napan pagdigusan
makitak rupak nagmarka uges pagiddaan
tay kannigid nalabbaga korte tallo ramay
ta tengnga adda isem nga rumangrang-ay
sipatsipatek pingping ko tano agmurmuray
agdigusak man tano maekkat asin ling-et
diyak napopootan agsagsagawisiwak met
napintas nga ayug; bassit a pangtarusan

narunawen tay adda bangbanglo a kandila
andardarepespes angin anggapo tay tawa
salsalaan angkakapintas naburdaan a kurtina
masirig ko magmagna agsinnumbangir kalsada
dagiti nadungngo nga agtutubo wenno kamaina
mangngeg kon agkanabtoog a tambor hulahula
kumkumpasan sumarsarisig aglagtolagto a sala

ayamuom pinya natedtedan bassit a kalua
inukupan gatat niyog adda pay payong na
sussusopen naingpis bibig a lumabbaga
diyak nasipsiputan ginammatan nat abagak
inyarasaas na nga “aguray ka bassit nagbilinak”
pinisel kot imana “ ala wen, biagko agur-urayak”
inpusipos kot bagik sak simmango, apo ragsak

inabel a seda ar-arakupennat singin a rang-ay
naatiddog kasla naingpis danum agsaysayasay
arakupek koma ngem adda met nagtoktoken
pabessagen na pay dotdot agong ko nagimasen
tinuno nga buldagat, sibuyas, kamatis, tirem
adda pay innapoy, dayap, naimas pangmalem
naumelak inagekak ni biagko, karakep isem

009F anya met ten

manonton dalan

adu dagiti pulong mo, matarusak
diyak imbagbaga ngem nagdusaak
ammok dagiti napalabas intalmegnak
anya pay met maaramid nanglipasen
pada ta ngelngel liklikiyaran nat saem
adda amak; nagtungpalak babalawem

nalday ima nga umar-arakop itay
nagrinnakep nabannog a kidkiday
napigsat guyod inana umadani
naul-ulimek awan mangngeg uni
umalingasaw ayamuom ni ayat
agtedted ling-et aggapo kurimatmat

sapasapen sipnget guyod nat pul-oy
ngem maaninaw mot aglanglangoy
diyay playa, agkalap dagiti agtutubo
pasungadandat maiyan-anod a limo
adda pay iggem da a lampara
linglingdan nat natirad a pana
ur-urayen da agparang tay kurita
bagsolenda, agsayasay nangisit, tinta

adu natiliw dan, napnon tay kuribot
adda pay inubon ti naingpis a barot
aglaglagto kayat dat makalibas,ngata
makitak nakauges ti danum a dara
rumasrasaw sipatsipaten dalluyon
nagbalin ladawan napintas a sabong

addaak teppang maay-ayatan; agbuybuya
maka-apalak siak man tay bimmaba
makitak nagdarakkelan nga sidsida
apros-aprosak, pagilad-iladan tay imak
makatkatawaak, pasaray maaryekak
pagammuan limmagto, tinungpaak

apk= agpagpaggaak

009E nakadekket tat awan baet

manonton dalan

nangngeg ko nagrikep, nanalteek
ayamuom, nagbanglo im-imasek
apagdarikmat rimmakep ulimek
uni dagiti sapatos nga aguy-uyas
nag-innabot nalailo nga perreng
rumkuas iliw a saan maikeddeng

nariknak aggitebgiteb tudok rosas
kahon tsokalati tay imak naikublas
pudot arakop ken imas nakasadag
nanglipat sanniit, rumkuas lawag
nalukag kaunggan, arimasaen mata
“ay-ayaten ka” natarnaw nga bel-a

pinerreng nak naulimek aglawlaw
nakisurot met nakudkudrep silsilaw
agsaritaak koma ngem napartak bibig
dimket, naumel, awan pulos binigbig
inngatok rosas inyaw-awat ko kinyam
dimo inkaskaso nakadekket tay rupam

induron ka bassit tano maikabil ko rabaw mesa
dimo nadnadlaw ta kumawkawiwit ka agdama
kaslaak ap-apungulen, toy pudot bumarbara
nakibinnitek rusok nangparnuay samiweng
nagam-ampayag saanen, saanen maikeddeng
aginggat nagtungpal nalimed nga ayat ken isem

sumganad naimpusuan nga estorya, panay katawa
buybuyaen data, sarming ta atep, diyak itay nakita
pasaray apputem ngiwat ko kakayatam tay ulimek
iwalwalin ko, kagatkagatek ngem pandagannak met
dengdengem barukong ko, kunam ipukpukaw naka
anya pay met dungngo, nakadekket tat awan baet