009H adda pay kilabban

manonton dalan

kinitak tay nangitulod ti makan mi
napanonot ko, daytat trabahok idi
ad-adut pasarabor ken suweldo mi
mayat idi ni kasinsin ti adda sango
ammo no sinno dagiti mangited ado
tay nangisit awan a pulos sigurado

no dagiti moreno nga kudil tarakenko
sobraak ikabil ko tuwalya, bangbanglo
mangitugutak pay pinakbet ken adobo
no agawid dan mangbalkotak pinya
tsokolate sangpet ni ‘nang; macademia
isu, sagpaminasan birbriruken dak kano

nadungdungngo nga subot balasang
uray la aglua no makakagat nagasang
ilimlimed ko dagiti karekkek ko piman
wen, madandanaganak nga isut mabainan
maka-alis, agpinpinnerreng kami lattan
ngem mariknak ut-ut ken kibur kaunggan

appo-apputek ngiwat ko no dakkel maisubo
awan maaramkidak adingko agbisin tay nomo
agkusikusilap no agsaowak nga napunpunno
lumabbaga ngatat rupak, adda pay bain ko
no idiay away daytoy imak lat aramatek
pati toy napudpudot nga digo ket igupek

no in-inutek mangan toy riknak agmadi
saanak mabsog ken mananam, kaskasdi
binussog ko toy malidliday nga matmatak
tay isem na ken pintas na nga nakapablaak
abrutek laengen pangmalem no agawidak
adda pay tay kilabban ken puraw nga arak

009G makaisem a makarakep

manonton dalan

nagbennabennatak a napan pagdigusan
makitak rupak nagmarka uges pagiddaan
tay kannigid nalabbaga korte tallo ramay
ta tengnga adda isem nga rumangrang-ay
sipatsipatek pingping ko tano agmurmuray
agdigusak man tano maekkat asin ling-et
diyak napopootan agsagsagawisiwak met
napintas nga ayug; bassit a pangtarusan

narunawen tay adda bangbanglo a kandila
andardarepespes angin anggapo tay tawa
salsalaan angkakapintas naburdaan a kurtina
masirig ko magmagna agsinnumbangir kalsada
dagiti nadungngo nga agtutubo wenno kamaina
mangngeg kon agkanabtoog a tambor hulahula
kumkumpasan sumarsarisig aglagtolagto a sala

ayamuom pinya natedtedan bassit a kalua
inukupan gatat niyog adda pay payong na
sussusopen naingpis bibig a lumabbaga
diyak nasipsiputan ginammatan nat abagak
inyarasaas na nga “aguray ka bassit nagbilinak”
pinisel kot imana “ ala wen, biagko agur-urayak”
inpusipos kot bagik sak simmango, apo ragsak

inabel a seda ar-arakupennat singin a rang-ay
naatiddog kasla naingpis danum agsaysayasay
arakupek koma ngem adda met nagtoktoken
pabessagen na pay dotdot agong ko nagimasen
tinuno nga buldagat, sibuyas, kamatis, tirem
adda pay innapoy, dayap, naimas pangmalem
naumelak inagekak ni biagko, karakep isem

009F anya met ten

manonton dalan

adu dagiti pulong mo, matarusak
diyak imbagbaga ngem nagdusaak
ammok dagiti napalabas intalmegnak
anya pay met maaramid nanglipasen
pada ta ngelngel liklikiyaran nat saem
adda amak; nagtungpalak babalawem

nalday ima nga umar-arakop itay
nagrinnakep nabannog a kidkiday
napigsat guyod inana umadani
naul-ulimek awan mangngeg uni
umalingasaw ayamuom ni ayat
agtedted ling-et aggapo kurimatmat

sapasapen sipnget guyod nat pul-oy
ngem maaninaw mot aglanglangoy
diyay playa, agkalap dagiti agtutubo
pasungadandat maiyan-anod a limo
adda pay iggem da a lampara
linglingdan nat natirad a pana
ur-urayen da agparang tay kurita
bagsolenda, agsayasay nangisit, tinta

adu natiliw dan, napnon tay kuribot
adda pay inubon ti naingpis a barot
aglaglagto kayat dat makalibas,ngata
makitak nakauges ti danum a dara
rumasrasaw sipatsipaten dalluyon
nagbalin ladawan napintas a sabong

addaak teppang maay-ayatan; agbuybuya
maka-apalak siak man tay bimmaba
makitak nagdarakkelan nga sidsida
apros-aprosak, pagilad-iladan tay imak
makatkatawaak, pasaray maaryekak
pagammuan limmagto, tinungpaak

apk= agpagpaggaak

009E nakadekket tat awan baet

manonton dalan

nangngeg ko nagrikep, nanalteek
ayamuom, nagbanglo im-imasek
apagdarikmat rimmakep ulimek
uni dagiti sapatos nga aguy-uyas
nag-innabot nalailo nga perreng
rumkuas iliw a saan maikeddeng

nariknak aggitebgiteb tudok rosas
kahon tsokalati tay imak naikublas
pudot arakop ken imas nakasadag
nanglipat sanniit, rumkuas lawag
nalukag kaunggan, arimasaen mata
“ay-ayaten ka” natarnaw nga bel-a

pinerreng nak naulimek aglawlaw
nakisurot met nakudkudrep silsilaw
agsaritaak koma ngem napartak bibig
dimket, naumel, awan pulos binigbig
inngatok rosas inyaw-awat ko kinyam
dimo inkaskaso nakadekket tay rupam

induron ka bassit tano maikabil ko rabaw mesa
dimo nadnadlaw ta kumawkawiwit ka agdama
kaslaak ap-apungulen, toy pudot bumarbara
nakibinnitek rusok nangparnuay samiweng
nagam-ampayag saanen, saanen maikeddeng
aginggat nagtungpal nalimed nga ayat ken isem

sumganad naimpusuan nga estorya, panay katawa
buybuyaen data, sarming ta atep, diyak itay nakita
pasaray apputem ngiwat ko kakayatam tay ulimek
iwalwalin ko, kagatkagatek ngem pandagannak met
dengdengem barukong ko, kunam ipukpukaw naka
anya pay met dungngo, nakadekket tat awan baet

009D wen nga agpayso

manonton dalan

pagka-addang kot mano, nagin-innayad
adu nga tao kayat agpangato, nakalinya
maay-ayatan da, siak lan sa awan kadua
adda immasideg nakarungiit, nagdamag
adinno kano makagatang ti sangapungo
inayabak tay “front desk” sinaludsod ko

intugaw ko nga bassit, umay ni lagip
kaslaak guyuden ken iduron maipit-ipit
oh! rikna iyadayum man tay biddut
denggem dagiti rumrumkuas a pudot
inka kitdi ited ta sabong sakbay malaylay
baam kadi naglabas punasem lidliday

sumangbay bang-ar kaunggan, iliw
diyak mamati ngem agpalpaliiw
kuddokuddoten nat derraas rikna
kasla bagkatennat saksaka
ay apo insigida nga mapanak
napintas met la toy langlangak

inselsel kot bagik ta lugan agpangato
adda pay agtutukel nga kararag ko
kadanon ko adda pay mano a kadapan
ngem kaniak ti panagkitak nagadaywan
kada addang napnuan estorya ni ayat
dumagdagsen, marigatanak nga ipayat

kitakitaek numero dagiti kuwarto, 1203
adayo pay gayam adaddiyay pungto
agkanabtoog toy barukong ko nagtoktok
naglukat, ay nakabangbanglo tay umarakop
nangngeg ko “ nagbayagen ooh! dungngo”
naebel-ak manu a balikas “wen nga agpayso”

009Cadingko kunak a inyarasaas

manonton dalan

agwaras da bangbanglo aglawlaw
kakarruba sumirsirip a kumablaaw
iyisem ko met saak agpaypayapay
kasta man bibiyag mi kasla away
awan nalimed kinyada a darikmat
nagalis tay dila da arig tay paltat

malemen, nasungad puskol lugan
nakagundawayak agpanonot man
uray la maka-ellekak a masikuran
kasla met magmagna nga pag-ong
sa agkaiwara dagiti kullakullaong
agamakak nga malolo tay sabong

nagsulbato pay tay karruba mi
pagarup na adda obrak rabii
inbibig ko saan; kayat nat umay
adayo kunak sadiay banbantay
immisem adalem sana inkidday

nakadanonak, inwaras ko kitak
pasig nangisit seko nga kapadak
umasideg balasang”diliberi manong,
ited yo kaniak siak maka-ammon”
kinagat kot bibig ko sak intangad
“kaslaak gayam labada; maibilbilad”

pambar ko ammok no adino papanak
kinaot ko tay bulsak, adda impaimak
nagisem, intudo na saan ko masarak
agyamanak adingko kunak inyarasaas
kagiddan inyalis ko nga naparpardas
marikna kon barukong ko kumarab-as

0009B no adda pay agyamanak

manonton dalan

nagpasyarak nga agmaymaysa dita law-ang
naibos panawen ko nga agpanpanonot man
adda daydiay kumpet ayat, makarungiitak
nadalapos ko pay tay pagpadanum, bisibis
nabasaak, napatupmaak iggem ko naiwaris
intultuloy kot agdaldaliasat, makaliwliwa

naumaak wenno umay tay bannog kadi
pinarpartakak simmangpet; umayen rabii
nadanon ko ni ading ko nga balasang
masdaaw; ibabaon ko nga gumatang
sabong, tsokolati ken bangbanglo man
makaisem ngem diyak sinungsungbatan

inayabak da manang ta buludek tay lugan
ammok dinak pabainan;siyak tagatarimaan
ni uliteg ko agpada kami lupot, mabalin
ko nga ipadas diay adda buaya nga berdin
nataraki relo ni manong ngem adda siakpad
narigat no awan kuwarta; awanan ka kalidad

di nagbayag nakasaganan, adda pay “aysus”
ungngo-ungoak sabsabong a kapurpuros
apo a rikna agrakutok, uray la kiburen nat ulok
ngem napadas ko toy idin, napuskol pay buok
inayabak ni biagko, makabang-ar nga sungbat
“dungngo, anya oras ti iyumay mo”, nalpas

diyak sinungbatan ngem ammo na umayak
nairruam isunan a kanayon maladladawak
dakkel bang-ar pusok apan koman maibagi
no naliday sumaganad, kaslaak nagsangaili
nasam-it nga isem umanayen para kanyak
no adda pay sursurok na, a ket agyamanak


aysus –lexus
buaya nga berdi- lacoste
siakpad-ipod

009A sumaganad a pasdek

manonton dalan

pul-oy angin daya, rakpennat agsapa
naurnong nga linnaaw agtedted daga
lumasbang, agrusing dagiti mulmula
pasungadandat nalam-ek nga raya
agraman tumatayab agampayag da
sirsirpen dat agkakarayam ta sanga

napnuan pingping ko nalailo isem
ay-ayuen na amin-amin pati nakem
pumaragsit payen nadangran a tumeng
kalpas nariknak rayum nga agmalem
ngem diyak mabukel no anya aramidek
sumrekak manen ti sumuganad a pasdek

wen nalukag manen naikupin nga ayat
agam-ampayag tay dati nga agpapa-arayat
agrukbos ta natedtedan manen linnaaw
ngem adda biddut mabati nga mawaw
kasla dati awan sapata, makaammo ka
ngem apay biagko agsublisubli ta

tatta agduadua nga rikna rakpennak
ammo kon pagtungpalan no umayak
ipapas mo dagiti unget mo kaniak
idi naan-anusak, tatta adda butengko
ta nagbalbaliwen toy nomo, biagko
ngem uray no kasta, addaak tonto

ikarigatak nga maibuksilan masungadak
dalan nawaya ta napintas dagiti gandat
no mabalin koma nga inayon kot kararag
tano maisalakanak ti agdama nga peggad
dumteng koma urnos ken mangilawlawag
ta naumaakon ti nasennaay a panagbibiyag